Quanno tenevo vent'anne
nnanze ô munumento d' 'e cadute
chiurevo l'uocchie e penzavo:
m'aggio muorto 'e famma 'a quanno ero piccerillo;
maje na lira ncuollo,
maje nu bagno 'o mare;
â scola ievo, è 'o vero,
ma ch' 'e pezze nculo!
'E cumpagne mieje?... Ahé! Peggio ancora!
Nu teneveno 'e sorde
manco pe ghì 'o cinema 'a domméneca!
Dê tasche nu careva na lira
manco si ce giràveno sotténcoppa!
Na vota, era maggio,
scennette da Avellino l'Onorevole
p' 'o cumizio mmiez' â chiazza
e ce dette 'a benedizione.
"Baiano è come una bella donna
affacciata al balcone"
ce dicette cuntento cu l'uocchie a fòre.
"Prima o poi troverà un buon partito
e ben si mariterà!"
"Chisto ce sta scaricanno!"
penzavo io che poco capevo 'e pulitica.
"P'aiutà l'ata gente d'Avellino!"
Ma nuje po currévemo a vutà
e a mantené 'o sacco
c' 'a speranza 'e verè 'o paese nuovo!
Tutte 'e matine 'a bella femmena
s'affacciava ncoppa ô barcone d' 'a casa,
ma nisciuno guaglione 'a cecava,
nisciuno 'a guardava manco c' 'o binocolo!
Baiano steva là comme a primma,
a guardà crescere l'ate paese.
E nuje cuntinuàvemo a ce puzzà 'e famma!
Doppo cinche anne, n'ata vota
scennette da Avellino l'Onorevole
e nce dette n'ata vota 'a benedizione.
"Baiano è come una bella donna
affacciata al balcone"
nce dicette chiù cumminto ancora.
"Prima o poi troverà un buon partito
e ben si mariterà!"
"Chisto ce sta n'ata vota scaricanno!"
penzavo io che mo capevo nu poco 'e chiù.
"P'aiutà l'ata gente d'Avellino!"
Però nuje currévemo sempe a vutà
e a mantené 'o sacco pe Isso.
'O juòrno appriésso tutta cuntenta
comme spuntaje 'o sole 'a bella femmena
s'affacciaje ncoppa ô barcone d' 'a casa,
ma nisciuno 'a cecaje manco mo,
nisciuno 'a guardàje manco c' 'a cora 'e l'uocchie!
Baiano steva sempe là comme a primma,
âspettà l'aiuto d' 'o Signore...
se scenneva d' 'o cielo!
L'ata gente vicina cresceva e nuje...
nuje cuntinuàvemo a ce puzzà 'e famma!
Nu poco a vota però accumminciàttero
a spuntà 'e capille grige chê primme rughe
nfronte a chella bella signurina,
ma l'Onorevole ormai Senatore
senza maje aizare l'uocchie
pe guardà ncoppa ô barcone 'e chella casa
ripeteva sempe 'e stesse chiacchiere!
"Baiano è come una bella donna
affacciata al balcone...
Prima o poi troverà un buon partito
e ben si mariterà!"
Ma quale buon partito?
Quale marito d'oro?
Baiano steva sempe peggio,
jeva arreto e maje annanze.
L'ata gente vicina cresceva, cresceva, cresceva
e nuje?...
Embè nuje cuntinuàvemo a cuntà 'e peducchie!
Nu juòrno senza criànza
accumminciàttero a carè 'e diente
a chella bella femmena,
a spuntà 'e capille ianche e 'a pelle a s'arrepecchià!
Ma a maggio 'o Senatore scenneva d'Avellino
e cu 'e spalle 'o barcone
ripeteva sempe 'a stessa cantilena!
"Chisto nce sta piglianno pe culo!"
dicev' io scunzulato cu l'uocchie apierte!
"E nuje mantenimmo 'o sacco
p' 'a gente d' Avellino!"
Na matina 'a signorina
s'affacciaje ncoppa ô barcone e...
Maronna mia d' 'o Carmine
che schifezza 'e femmena s'era fatta!!!
Brutta comme a nu culera, senza 'e diente,
cu quatto capille ncapa e l'uocchie appise
e doje zizze mosce mosce
ch' 'e puteva girà attuorno 'o cuollo
comme a na scialla 'e lana!!!
E 'o Senatore cuntinuava a sfottere a gente!
"Baiano è come una bella donna
affacciata al balcone..."
Allora nu figlio 'e ndrocchia
annascuso mmiez' â folla
alluccaje cu tutta 'a forza d' 'a voce:
"Senatò, ma vuje l'avìte chiù vista
chella bella femmena ncoppa ô barcone?
Guardate mo comme s'è fatta!"
'O senatore avizzaje l'uocchie e...
e rimmanette sicco ncoppa ô fatto;
p' 'o scuorno calaje l'uocchie
e le s'affugaje a parola nganna!
"Ma vuje nun avìte capìto
nu cazzo d' 'a pulitica!"
avette sicuramente penzà ntra isso e isso
tutto ncazzato!
"Site venute addò me
sulo pê fatte vuoste e d' 'e pariente
o pe quacche amico c' 'a famiglia grossa!
Maje pe nu problema d' 'o paese!
E mo che vulite a me?"
"Senatò, Baiano nun s' è mmaretata!
E' rummanuta na brutta zitella!
E 'a colpa è nu poco pure 'a vosta!!!
Avìte penzato sulo a regnere 'o sacco
e a purtà 'e vote a casa vosta!
Dint' a tante anne nun avìte maje capito
che 'a gente vutava a vuje c' 'a speranza 'e migliurà?
E nuoste cà a Baiano
'a pulitica nun l'hanno maje saputo fà!!!
E mo pe rimedià è tiempo 'e nce dà na mano!
Nu poco vuje, nu poco nuje
verimmo 'e aizà sta varca!!!
(Baiano: Dicembre 2004)
