Na sera 'e maggio verso 'e nove.
Toc! Toc!
Chi é?
Songo 'o quatto,
porto pure 'o sette
e 'o dicennove.
Trasite! Trasite!
Si vulìte favorire...
No, no! E' ampréssa pe mangiá!
Dicìte! Dicìte!
Io vulesse fà 'o cinema,
'o campo, 'a pista d' 'e bocce
e 'a chiazza nova!
E pe fà chesto
m' avit' 'a vutá!
'A casa mia po
é sempe aperta!
'O quatto vene eletto,
festeggia 'a vittoria
e nun se fa chiù veré!
Sale e scenne ogne matina
ncravattato e ndaffarato,
dice e fa sott' 'o comune,
parla ride nsacca e port' a casa:
é arrivato 'o mumento pe mangiá!
Doppo cinche anne
na sera 'e maggio verso 'e nove.
Toc! Toc!
Chi é?
Songo n'ata vota 'o quatto.
Mo peró porto 'o tre
e 'o dicessette!
Dicìte! Dicìte!
Sapìte? Vulevo fà
'o cinema... 'o campo ...
'a chiazza nova ...
Vulevo fà tante cose
ma nu me l'hanno fatte fà!
Ce vonno chiú vote
pe esse chiù forte.
Vutateme tutte quante d' 'a famiglia
e io ve prumetto che sta vota
ve faccio 'o paese nuovo!
L' hai sentito, mugliera mia?
Vuleva ... vuleva ...
Ma nun ha fatto niente!
Chillo nu sapeva fà
'o cerchio manco c' 'o bicchiere.
Ha penzato sulamente
a s' abbuffà ...
a se régnere 'a panza.
Ha dato 'o posto ô frate,
ô nepote e ô cainàto,
e ha aizáto n'ato piano
ncoppa â casa.
E mo nuje che facimmo, marito mio?
Ce 'o dammo 'o voto?
Sì, mugliera mia.
Vutammo 'o quatto,
'o tre e pure 'o dicessette.
Peró... e chell' ata lista!
(Sirignano: 16 Dicembre 1995 - "Menzione"
al 2° Concorso Nazionale di Poesia "Fundus Serenianus")
