"Che bello ciuccio!" dicette don Nicola
trasenno dint' â stalla c' 'a muglièra.
Peró é nu poco chiatto ncopp' ê pacche
e tene 'o grasso attuórn' ô cuollo!
Cá ce vó súbbeto na dieta
cu poca évera e senz' 'o pasto.
Accummenciáje accussì a sparagná
ncopp' ô fieno e ncopp' â vrénna
e nu poco a vota ncopp'a tutto.
Comme scennéva 'e miezzo chilo,
'o purtava a spasso p' 'o paese
nnanze e arèto p' 'o fà ammirà!
Uuuh! Quant' era felice don Nicola!
E guaie a chi diceva che nun era ovéro:
diventata nu nemico capitale!
P' 'o sfottere allora 'a gente jéve dicenno:
uh comm' è sicco 'o ciuccio 'e don Nicola!
Sparagna oggi, sparagna dimáne
'o mparatte a nu mangià.
Ma na bella matina cu na faccia ianca
e senza forze 'o truvaje ncopp' ô fieno:
nun ce 'a faceva manco a s'aizá.
Povero ciuccio, chiurétte l'uocchie
primma 'e dicere c' 'a vita è bella
pure che pacche chiatte
e 'o grasso attuórn' ô cuollo!
(Baiano: 12 Dicembre 1993)
